Состанок на сукцесорите на СФРЈ

Дводневен состанок на високите претставници за сукцесија на поранешната СФРЈ започнува денеска во Белград, на кој ќе се разговара за прашања за наследството.

Оваа средба на високите претставници за сукцесија на Словенија, Хрватска, Србија, БиХ и Македонија следи две години по последниот состанок одржан во 2007 во словенечкото место Брдо при Крањ.

На дневен ред на состанокот е извршувањето на договорот за наследство во сите негови димензии, изјави за агенцијата ста, високиот претставник за сукцесија на Словенија Руди Габровец, додавајќи дека на средбата треба да се види „до каде сме, кои се проблемите и што треба да се стори тие да се отстранат“.

Високите претставници за поделба на имотот на СФРЈ, како што е најавено, ќе зборуваат за договорот за наследство и за сите негови прилози, меѓу кои и за воениот имот, културното наследство, поделбата на дипломатско-конзуларните претставништва, повелба на неспорниот износ на обврски спрема Обединетите нации, прашањето за мешовитите банки и државните архиви.

Македонија на состанокот во Белград ја претставува Виктор Габер.