Обама бара брзо обновување на мировните преговори за Блискиот Исток

Aмериканскиот претседател Барак Обама повика на брзо обновување на мировните преговори меѓу Израелците и Палестинците. Обама вчера
во Њујорк се сретна со израелскиот премиер Бенјамин Нетанјаху и со претседателот
на Палестинците, Махмуд Абас.

Средбата се одржа во њујоршкиот хотел „Волдорф Асторија“, во рамки на 64-та сесија на Генералното собрание на Обединетите нации. Нетанјаху по средбата изјави дека е постигнат напредок во насока на решавање на конфликтот, но оти претстои уште многу работа. Обама изјави дека специјалниот пратеник на САД за Блискиот Исток, Џорџ Мичел, следната недела повторно ќе се сретне со преговарачите на Израелците и на Палестинците.